2021 წლის აგვისტოში, წინა თვესთან შედარებით, კომერციული ბანკების მიერ ეკონომიკის დაკრედიტება 495.7 მლნ ლარით გაიზარდა და მთლიანი მოცულობა 39.6 მლრდ ლარს გაუტოლდა. ამის შესახებ ეროვნული ბანკის აგვისტოს თვის მიმოხილვაშია აღნიშნული.
საკრედიტო პორტფელის მატება როგორც ეროვნული, ასევე უცხოური ვალუტით დაკრედიტების ზრდამ განაპირობა. კომერციული ბანკების მიერ გაცემული სესხების პორტფელის წლიური ზრდის ტემპმა კი 16.5% შეადგინა. გაცვლითი კურსის ეფექტის გარეშე კი, სესხების წლიური ზრდა 14.2% იყო. საკრედიტო პორტფელის 89.1% გრძელვადიან სესხებზე მოდიოდა, რომლის 53.2% უცხოური ვალუტით იყო გაცემული. მოკლევადიან სესხებში კი უცხოური ვალუტით სესხების წილი 40.6 პროცენტს შეადგენდა.
მიმოხილვის მიხედვით, საანგარიშო პერიოდში, ეროვნული ვალუტით გაცემული სესხები 344.2 მლნ ლარით (1.8 პროცენტით) გაიზარდა და 19.04 მლრდ ლარს გაუტოლდა. აღნიშნული ცვლილება, ძირითადად ფიზიკური პირების გრძელვადიანი დაკრედიტების ზრდამ განაპირობა. უცხოური ვალუტით გაცემული სესხების მოცულობა აგვისტოში 57.7 მლნ აშშ დოლარით (0.9 პროცენტით) გაიზარდა, წინა თვესთან შედარებით და პერიოდის ბოლოს 6.75 მლრდ აშშ დოლარი შეადგინა. ამ კატეგორიის კრედიტების 62.4 პროცენტს იურიდიულ პირებზე გაცემული სესხები შეადგენს, ხოლო 53.2% გრძელვადიან დაკრედიტებას უჭირავს.
საბანკო სისტემაში საშუალო შეწონილი საპროცენტო განაკვეთები სესხებზე, მიმდინარე წლის აგვისტოში, 0.3 პროცენტული პუნქტით გაიზარდა და 12.8 პროცენტს შეადგენს. უცხოური ვალუტით დენომინირებულ სესხებზე, საშუალო შეწონილი წლიური საპროცენტო განაკვეთი 0.2 პროცენტული პუნქტით გაიზარდა და 6.4 პროცენტს შეადგენს. ეროვნული ვალუტით გაცემულ კრედიტებზე საპროცენტო განაკვეთი 0.3 პროცენტული პუნქტით, 16.2 პროცენტამდე მოიმატა. ეროვნული ვალუტით სესხების შემთხვევაში, საპროცენტო განაკვეთებმა ფიზიკური პირებისთვის 18.8 პროცენტის ნიშნულზეა, ხოლო იურიდიული პირების სესხებზე 0.6 პროცენტული პუნქტით, წლიურ 12.7 პროცენტამდე შემცირდა.
უცხოური ვალუტის შემთხვევაში, იურიდიული პირების სესხებზე საპროცენტო განაკვეთები 0.2 პროცენტული პუნქტით გაიზარდა და 6.7 პროცენტის დონეზეა, ხოლო ფიზიკური პირების მიერ უცხოური ვალუტით აღებული სასესხო განაკვეთები კი, 5.5პროცენტის ნიშნულზეა. წინა წლის აგვისტოსთან შედარებით, საპროცენტო განაკვეთები უცხოური ვალუტის სესხებზე 0.4 პროცენტული პუნქტით შემცირდა, ხოლო ეროვნული ვალუტის სესხებზე - 0.7 პროცენტული პუნქტით გაიზარდა.